الـProduct Owner مش مطلوب منه يمثل ان كل حاجة تمام طول الوقت

الـProduct Owner مش مطلوب منه يمثل ان كل حاجة تمام طول الوقت
و مش مطلوب كمان ينقل كل خوف وضغط جواه للتيم

المطلوب منه يعرف يتعامل مع الخوف والضغط من غير ما ينقلهم للتيم

في أوقات كتير الـProduct Owner بيكون شايف حاجات التيم مش شايفها

ضغط من الإدارة علشان ننجز وخلاص
مواعيد مش واقعية
طلبات جديدة داخلة في نص الطريق
و Stakeholders مستنيين نتائج
و مخاطر بدأت تظهر على المنتج

و أحيانا سكاكين بتتسن للتيم قبل حتى ما المشكلة تحصل

هنا بيبان الفرق بين Product Owner بينقل الضغط زي ما وصله
و Product Owner فاهم دوره فعلا

القوة مش إنك تدخل على التيم و تبينلهم ان كله تمام ومفيش أي مشكلة
و أنت عارف إن فيه مشكلة

و في نفس الوقت، الشفافية مش إنك تبينلهم اننا مش هنلحق، والإدارة مضغوطة، و الدنيا مش مبشرة

لأنك كده مكنتش شفاف بس
أنت نقلت قلقك للتيم

دورك إنك تقول الحقيقة
لكن بطريقة تساعدهم يتحركوا بدل ما تحبطهم

بدل إحنا مش هنلحق
وضحلهم ان فيه مخاطرة في الموعد الحالي، فمحتاجين نراجع الأولويات، ونحدد إيه الأهم، وإيه ممكن يتأجل، ونوضح أثر أي طلب جديد

الـProduct Owner القوي مش بيخفي المشاكل
و مش بيضخمها
و مش بيرميها على التيم

هو بياخد الضغط، يفهمه، ويرجعه في صورة
أولويات واضحة
قرارات
حلول
و مفاضلات مفهومة

و في نفس الوقت، لازم يحمي التيم من الضغط غير المنطقي
و من الوعود اللي اتاخدت من غير الرجوع ليهم
و من فكرة إن مش كل مشكلة حلها نشد شوية وهنلحق

لكن حماية التيم مش معناها إنك تخبي عنه الحقيقة

التيم محتاج يعرف إحنا فين
إيه المخاطر
و ليه الأولويات اتغيرت

بس محتاج يعرف ده من شخص ثابت
مش من شخص بينقل له توتر الإدارة

و أعتقد إن دي من أصعب المعادلات في دور الـProduct Owner
تبقى صريح من غير ما تكون محبط
تبقى قوي من غير متمثل
تحمي التيم من غير ما تعزله عن الواقع
و تدافع عن المنتج من غير متحرق الناس علشانه

لان الـProduct Owner مش مجرد شخص بيحدد الأولويات
أوقات كتير هو الشخص اللي واقف في النص
بين ضغط الإدارة
و توقعات الـStakeholders
و قدرة التيم
و الواقع الحقيقي للمنتج

و شطارته مش إنه يمنع الضغط من الوجود
شطارته إنه ميسمحش للضغط يتحول لفوضى جوه التيم

#Agile #ProductManagement #ProductOwner #Lean #ProcessImprovement #Leadership #BusinessTransformation #SoftwareDevelopment #Stakeholder #BusinessAnalysis #Scrum #Workflow #StakeholderManagement #ChangeManagement #SDLC #Delivery #Roadmap #ProjectManagement #Teamwork